No ano 1982 publicábase a obra "La propiedad de la tierra en Galicia 1500-1936" do Profesor Ramón Villares Paz.

Este libro destacado na prolífica produción do Historiador lucense cumpre agora trinta anos sendo referente no estudo do proceso histórico sobre a evolución da terra en Galicia. A transición desde a propiedade territorial feudal, organizada en Galicia de modo hexemónico a través do sistema foral e protagonizada, dunha parte, polo clero e a fidalguía e, doutra polo campesiñado, ata a propiedade privada libre, conquistada por este último durante o primeiro terzo do presente século son os temas tratados. O libro iníciase, polo tanto, coa análise do contexto histórico no que campesiños e pequenos rendistas sucumben ás mans da puxante fidalguía, e remata co relato do proceso inverso acontecido trescentos anos máis tarde. A obra articúlase en tres partes: na primeira realízase unha análise do proceso de formación dos dominios, co obxecto de explicar na súa dimensión temporal a situación que, de modo sedimentado, aparece reflectida no Catastro de Ensenada de mediados do XVIII e que se caracteriza polo predominio da produción no seo da pequena explotación e o pagamento dunhas cuantiosas e diversificadas cargas. Na segunda parte exponse a contradición que leva consigo a permanencia do foro e doutros elementos propios do Antigo Réxime no contexto dunha realidade sustantivamente transformada pola revolución liberal, sobre todo no capítulo da propiedade territorial. Na terceira parte, por fin, relátase a rápida desaparición dun modo de organización da propiedade progresivamente consolidado ao longo do Antigo Réxime e mantido case incólume durante o século XIX, pero que, por diferentes e concorrentes razóns, empeza a esborrallarse cara a 1890 e pode considerarse definitivamente vencido á altura da II República.

Co gallo deste Aniversario, a rede ReVolta organiza o Seminario "Estudos sobre a propiedade da terra: desde a historia para o futuro. 30 anos da publicación de La propiedad de la tierra en Galicia, 1500-1936, de R. Villares" na Casa do Saber en Lugo e na Casa da Cultura de San Salvador de Asma en Chantada, os días16 e17 de novembro de 2012.

Ramón Villares Paz (Cazás-Xermade, 1951) é Catedrático de Historia Contemporánea da Universidade de Santiago de Compostela desde 1987. Decano da Facultade de Xeografia e Historia (1986-1990) e Rector Magnífico da Universidade de Santiago (1990-1994), membro fundador e Presidente (1996-2002) da Asociación Española de Historia Contemporánea, na actualidade é Director en Galicia da UIMP (dende 1998). Tamén pertence aos patronatos do Museo do Pobo Galego, da Fundación Luis Seoane e da Fundación Otero Pedrayo. Actualmente é Presidente do Consello da Cultura Galega, desde 2006.