O vindeiro martes día 5 de novembro ás 11h na Aula de master do Depto de Historia Contemporánea e de América HISTAGRA organiza a presentación do proxecto de investigación da Fundação para a Ciência e a Tecnologia (FCT) de Portugal: "Agricultura en Portugal: alimentación, desenvolvemento e sustentabilidade (1870 - 2010)", a cargo da súa investigadora principal, Dra. Dulce Freire (Instituto de Ciências Sociais da Universidade de Lisboa).

Dulce Freire (Alvaiázere - Leiria, 1969),  na actualidade é Investigadora postdoutoral no Instituto de Ciências Sociais (ICS) da Universidade de Lisboa. Doutora en Historia Económica e Social Contemporánea pola Universidade Nova de Lisboa (2008). Desde 1990 dirixe o seu interese investigador cara temáticas relacionadas coa Historia rural e a agricultura tanto no contexto portugués como no ibérico. Ten estudado a este respecto aspectos como o encadramento institucional do sector agrario, os movementos sociais, os procesos de innovación tecnolóxica ou a memoria colectiva das sociedades rurais. Ten sido research fellow no Institute of European Studies da University of California (Berkeley) e ten realizado estadías de investigación en Francia, na École de Hautes Études en Sciences Sociales (2005) e en España (Universidade de Santiago de Compostela, 2006). Desde 2006 é, xunto con A. Schuurman chair da sección de Historia Rural do European Social Science History Conference (ESSHC), congreso internacional bianual organizado polo Instituto Internacional de Historia Social de Amsterdam. Dirixe o Proxecto de Investigación (2012 - 2014): "Agricultura en Portugal: alimentación, desenvolvemento e sustentabilidade", financiado pola Fundação para a Ciência e a Tecnoloxia (FCT - Portugal).