Histagra

Diego Conde, novo académico correspondente da Real Academia de Ciencias Veterinarias de España

Diego Conde, novo académico correspondente da Real Academia de Ciencias Veterinarias de España

Este luns 19 de decembro, o membro colaborador de HISTAGRA, Diego Conde foi elixido académico correspondente da Real Academia de Ciencia Veterinarias de España (RACVE) dentro da sección 5ª de Historia da Veterinaria.
Reunida a Xunta Plenaria Extraordinaria da RACVE, esta deu o seu voto favorable á proposta avalada polos académicos de número Dr. Miguel Ángel Vives Vallés, Dr. José Manuel Etxaniz Makazaga e a Dra. María Cinta Mañé Seró.

Con esta elección recoñecese o traballo que durante os últimos anos ven realizado Diego Conde a prol da recuperación e divulgación da historia da profesión veterinaria e a da gandería, especialmente no ámbito galego. A súa tese doutoral Veterinaria e mellora pecuaria na Galicia contemporánea. O papel de Juan Rof Codina, baixo a dirección de Lourenzo Fernández Prieto e Manuel Cifuentes, serviu como base para a publicación de traballos que contan co recoñecemento de diferentes premios. Así, o libro Canto val unha vaca?. Da cuestión agraria á cuestión pecuaria recibiu en 2013 o Premio Manuel Murguía de Ensaio que concede a Deputación da Coruña, ou o traballo publicado por Xerais en 2015 Juan Rof Codina. Renovación na veterinaria e gandaría galega contemporánea que acadou o Premio Jesús García Calvo que convocan o Instituto Universitario de Estudos e Desenvolvemento de Galicia (Idega) da USC e a Fundación Feiraco, e que recentemente quedou finalista nos Premios da Crítica de Galicia.
Na actualidade, os seus estudos céntranse principalmente en dúas liñas de traballo. En primeiro lugar no proceso de mellora e transformación da Raza Rubia Galega a través da historia e a implicación dos gandeiros en dito proceso. Por outra banda, está recompilando información sobre o papel que xogou a profesión nas transformacións que se veñen levado a cabo nas explotacións leiteiras do noso país dende finais do século XIX, a evolución das condicións hixiosanitaria do leite e a importancia que as iniciativas cooperativistas tiveron durante este período.

Ligazóns:

http://racve.es/
http://histagra.usc.es/gl/persoa/3a130faf174c/

Documentos